ឪពុក ចាន់ វឌ្ឍនាកា ថា ថៃ និងម៉ាឡេស៊ីឲ្យប្រាក់ខែខ្ពស់ តែមិនល្អដូចជប៉ុន ទោះប្រាក់ខែទាប!

ភ្នំពេញ៖ លោក ចាន់ ចេស្ដា អភិបាលនៃគណៈអភិបាលខេត្តកំពត បានបង្ហើបថា មានក្លឹបបាល់ទាត់នៅថៃ និងម៉ាឡេស៊ីជាច្រើន បានព្យាយាមទាក់ទង ចាន់ វឌ្ឍនាកា ទៅលេងឲ្យក្លឹបពួកគេ ដោយហ៊ានឲ្យប្រាក់ខែខ្ពស់ៗទៀតផង ប៉ុន្ដែជម្រើសដ៏ល្អចុងក្រោយ គឺជប៉ុនទៅវិញទេ បើទោះជាប្រាក់ខែទាបជាងថៃ និងម៉ាឡេស៊ីក្ដី តែលោកសប្បាយចិត្តនឹងការអនុញ្ញាតឲ្យកូនប្រុសទៅលេងនៅទីនោះ ព្រោះជាកន្លែងអាចជួយសម្រេចគោលដៅធំៗជាច្រើននាអនាគត ។

ថ្លែងក្នុងឱកាសជូនដំណើរកូនប្រុសឡើងយន្ដហោះធ្វើដំណើរទៅប្រទេសជប៉ុន ដើម្បីចូលរួមជាមួយក្លឹបថ្មី Fujieda MYFC កាលពីយប់មិញលោក ចាន់ ចេស្ដា បានមានប្រសាសន៍ថា ការសម្រេចឲ្យកីឡាករ ចាន់ វឌ្ឍនាកា ទៅលេងនៅក្រៅប្រទេស មិនដោយសារប្រាក់ខែនោះទេ ។ ជំហ៊ានដំបូង គឺត្រូវការបទពិសោធន៍ និងបច្ចេកទេស ដើម្បីអភិវឌ្ឍន៍សមត្ថភាពរបស់គេឲ្យបានកាន់តែល្អប្រសើរ សម្រាប់យកបទពិសោធន៍ទាំងនោះ ត្រឡប់មកជួយក្រុមជម្រើសជាតិកម្ពុជាវិញ ។

ឪពុកបង្កើតរបស់ខ្សែប្រយុទ្ធជំនាញជើងឆ្វេងរូបនេះ បានបញ្ជាក់ថា «កូនប្រុសខ្ញុំប្រាក់ថា មានក្លឹបថៃ និងម៉ាឡេស៊ីទាក់ទងគេទៅលេង និងឲ្យប្រាក់ខែខ្ពស់ ប៉ុន្ដែក្នុងនាមឪពុកម្ដាយ ខ្ញុំសម្រេចឲ្យគេទៅលេងនៅជប៉ុន ដោយមិនសម្លឹងឃើញប្រាក់ខែទេ ព្រោះជប៉ុនជាប្រទេសរីកចម្រើនផ្នែកបាល់ទាត់នៅអាស៊ី ។

ដូច្នេះយើងអាចប្រើពាក្យសាមញ្ញថា គាត់(វឌ្ឍនាកា) អាចជាអ្នកខ្សោយក្នុងប្រទេសខ្លាំង ប្រសើរជាងគាត់ខ្លាំង នៅប្រទេសខ្សោយ ។ កត្ដានេះហើយទើបខ្ញុំសម្រេចឲ្យ វឌ្ឍនាកា ទៅលេងនៅជប៉ុន ទោះប្រាក់ខែទាបជាងថៃ និងម៉ាឡេស៊ីក៏ដោយ» ។ គួរបញ្ជាក់ថា កីឡាករវ័យ ២៣ឆ្នាំ ចាន់ វឌ្ឍនាកា បានធ្វើដំណើរចាកចេញពីកម្ពុជា ទៅជប៉ុនកាលពីវេលាម៉ោង ១០៖៥០នាទីយប់ថ្ងៃទី១២ ខែកុម្ភៈនេះ ដើម្បីចូលរួមជាមួយក្លឹបលំដាប់លីគទី៣ របស់ជប៉ុន Fujieda MYFC ក្នុងលក្ខខណ្ឌខ្ជីជើងមួយរដូវកាល ពីក្លឹបបឹងកេតអង្គរកម្ពុជា ។ ប៉ុន្ដែភាគីទាំងសងខាង មិនបានបង្ហើបឲ្យដឹងពីតម្លៃខ្លួននៃការផ្ទេរ និងប្រាក់ខែច្បាស់លាស់នោះទេ ។ តែមានប្រភពជិតស្និតនឹងកីឡាករពាក់អាវលេខ១១នេះ បានបង្ហើបថា វឌ្ឍនាកា ទទួលបានប្រាក់ខែខ្ទង់ម៉ឺនដុល្លារពីក្លឹប J League-3 នេះ ៕

អត្ថបទ៖ បុត្រា

មតិយោបល់

Sponsor

អត្ថបទថ្មីៗ