ចូវ សុធារ៉ា ប្រកាសចូលនិវត្តន៍ក្រោយបញ្ចប់ការប្រកួត Olympic Games នៅប្រេស៊ីល

នូ មករា June 4, 2016


 

ភ្នំពេញ៖ អតីតម្ចាស់មេដាយមាសកីឡាស៊ីហ្គេម ២ជំនាន់(២០០៩-២០១៣) កីឡាការិនីចំបាប់ ចូវ សុធារ៉ា បានប្រកាសចូលនិវត្តន៍មិនបន្ដអាជីពជាកីឡាការិនីចំបាប់ទៀតឡើយ បន្ទាប់ពីនាងបញ្ចប់បេសកកម្មចូលរួមប្រកួតក្នុងព្រឹត្តិការណ៍កីឡា Olympic Games រដូវក្ដៅ នៅទីក្រុង Rio ប្រទេសប្រេស៊ីល នាខែសីហា ឆ្នាំ២០១៦ខាងមុខ ។

img_7087

គួរបញ្ជាក់ថា នេះជាលើកទី២ហើយ ដែលកីឡាការិនី ចូវ សុធារ៉ា ប្រកាសចូលនិវត្តន៍ ខណៈកាលពីលើកទី១ នាងបានប្រកាសដូច្នេះបន្ទាប់ពីដណ្ដើមបានមេដាយមាសកីឡាស៊ីហ្គេមឆ្នាំ២០១៣ នៅមីយ៉ាន់ម៉ា ដោយសារតែនាងនឿយហត់ក្នុងអាជីពជាអ្នកចំបាប់ គ្រាដែលវ័យកាន់តែចាស់ កម្លាំងក៏ធ្លាក់ចុះ ហើយចង់យកពេលវេលាបន្ទាប់ដើម្បីមកបង្ហាត់បង្រៀនដល់ក្មេងៗជំនាន់ក្រោយវិញម្តង។

img_7109

យ៉ាងណាក៏ដោយ ក្រោយប្រកាសចូលនិវត្តន៍លើកទី១ មិនបានយូរប៉ុន្មាន និងដោយមានការជំរុញបន្ថែមពីថ្នាក់ដឹកនាំសហព័ន្ធកីឡាចំបាប់កម្ពុជាផងនោះ ចូវ សុធារ៉ា ក៏បានវិលមកហ្វឹកហាត់សារជាថ្មី ក្រោមការជួយជ្រោមជ្រែងពីគណៈកម្មាធិការជាតិអូឡាំពិកអន្ដរជាតិ ដើម្បីត្រៀមចូលរួមប្រកួតកីឡា Olympic Games ក្នុងឆ្នាំ២០១៦នេះ ប៉ុន្តែគួរឲ្យស្ដាយដោយសារនាងបានធ្លាក់ត្រឹមវគ្គជម្រុះ ដែលបានធ្វើឡើងនៅប្រទេសតួកគីកាលពីពេលថ្មីៗកន្លងទៅ ។

យ៉ាងណាមិញ ថ្វីត្បិតកីឡាការិនីវ័យ ៣០ឆ្នាំរូបនេះ ធ្លាក់ពីការប្រកួតជម្រុះមិនបានកៅអីពេញសិទ្ធិ ដើម្បីចូលរួមកីឡា Olympic Games ឆ្នាំនេះក៏ពិតមែន ប៉ុន្ដែដោយសារសមិទ្ធផល ដែលនាងធ្វើបានក្នុងការប្រកួតជម្រុះមានភាពល្អប្រសើរ គណៈកម្មាធិការអូឡាំពិកអន្ដរជាតិ ក៏បានផ្ដល់សិទ្ធិអនុគ្រោះដល់ ចូវ សុធារ៉ា ដើម្បីចូលរួមប្រកួតក្នុងព្រឹត្តិការណ៍ ដែលធ្វើឡើងរៀងរាល់៤ឆ្នាំម្ដងនេះតែម្ដង ។

MSP-1051

ថ្លែងប្រាប់អ្នកសារព័ត៌មាននាចុងសប្ដាហ៍នេះ ចូវ សុធារ៉ា បានបញ្ជាក់ថា៖ «ឱកាសបានចូលរួមប្រកួតកីឡា Olympic Games ជាថ្មី គឺជារឿងល្អ ដែលខ្ញុំត្រូវបញ្ចេញសមត្ថភាពលើកចុងក្រោយ ដើម្បីស្វែងរកលទ្ធផលល្អជូនប្រទេសជាតិ ប៉ុន្ដែក្រោយបញ្ចប់ការប្រកួតនេះ ខ្ញុំក៏នឹងបញ្ចប់អាជីពពីកីឡាចំបាប់នេះដែរ ។ តែយ៉ាងណាខ្ញុំ ក៏មិនទៅឆ្ងាយដែរ គឺខ្ញុំនឹងធ្វើជាគ្រូបង្វឹក បង្ហាត់ក្មេងៗជំនាន់ក្រោយ ដើម្បីធ្វើឲ្យកីឡាមួយនេះរីកចម្រើនៅថ្ងៃអនាគត» ។

10371407_1523107107900953_6276163159993671726_n

គួរបញ្ជាក់ថា ក្នុងការប្រកបអាជីពជាកីឡាការិនីចំបាប់ជាង ១០ឆ្នាំមកនេះ ចូវ សុធារ៉ា ធ្លាប់ដណ្ដើមបានមេដាយលើឆាកអន្ដរជាតិជាច្រើន ពិសេសគឺការប្រកួតស៊ីហ្គេមតែម្ដង ដែលនាងធ្លាប់ឈ្នះមេដាយមាស ២ដង គឺស៊ីហ្គេម លើកទី២៥ នៅឡាវ កាលពីឆ្នាំ២០០៩ រួមទាំងស៊ីហ្គេម លើកទី២៧ នៅមីយ៉ាន់ កាលពីឆ្នាំ២០១៣ រួមទាំងមេដាយប្រាក់ និងមេដាយសំរឹទ្ធផងដែរ៕

ដោយ៖ លាង បុត្រា

 

 

 

មតិយោបល់

ការប្រកួតកីឡាបាល់ទះ Leo Cup National Volleyball 2015 ផ្តើមរដូវកាលថ្មីជាមួយនឹងការគាំទ្រទ្វេដង!

ពីមួយឆ្នាំទៅមួយឆ្នាំវិស័យកីឡា បានទទួលបានការគាំទ្រពីសំណាក់ប្រិយមិត្ត នៅទូទាំងព្រះរាជាណាចក្រកម្ពុជាគួរឱ្យកត់សម្គាល់ ជាមួយគ្នានេះដែរ … អានបន្ត

ផលិតកម្មថោនទទួលការព្រមាន ៦ចំណុចពីក្រសួងវប្បធម៌ក្រោយចេញបទ «ជីវិតអ្នកប្រដាល់»

ភ្នំពេញ៖ បទចម្រៀងដែលមានចំណងជើងថា «ជីវិតអ្នកប្រដាល់» ដែលច្រៀងដោយលោក … អានបន្ត