ស សុខា៖ ប្តេជ្ញាសម្រេចឲ្យបាននូវមុំមួយក្នុងចំណោមមុំ ទាំង៤ នៃការពង្រឹងគុណភាពអប់រំ វិទ្យាសាស្ត្រ និងបច្ចេកវិទ្យា

មាស សុផាណារ៉ុង February 4, 2020


 

ភ្នំពេញ៖ នាព្រឹកថ្ងៃទី០៣ ខែកុម្ភៈ ឆ្នាំ២០២០ ឯកឧត្តម ស សុខា រដ្ឋលេខាធិការនៃក្រសួងអប់រំ យុវជន និងកីឡា តំណាងបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអញ្ជើញចូលរួមបើកកិច្ចប្រជុំបូកសរុបការងារ អនុវិស័យអប់រំកាយ និងកីឡា ឆ្នាំ២០១៩ និងលើកទិសដៅការងារឆ្នាំ២០២០ នៅសាលប្រជុំទន្លេបាសាក់២។

កិច្ចប្រជុំនេះក៏មានការអញ្ជើញចូលរួមពី អគ្គលេខាធិការគណៈកម្មាការជាតិអូឡាំពិក តំណាងគណៈកម្មការជាតិប៉ារ៉ាឡាំពិកកម្ពុជា និងតំណាំងគណៈកម្មការជាតិស្ប៉េស្យាល់អូឡាំពិកកម្ពុជា, ប្រធាន អនុប្រធានមន្ទីរ និងប្រធានអនុប្រធានការិយាល័យកីឡា ទាំង២៥ រាជធានី-ខេត្ត អគ្គនាយក លោកអគ្គនាយករង ប្រធាន អនុប្រធានអង្គភាព ប្រធាន អនុប្រធានការិយាល័យ និងមន្ត្រីរាជការក្រោមឱវាទ ក្រសួងអប់រំ យុវជន និងកីឡា។

កិច្ចប្រជុំបូកសរុបការងារអនុវិស័យអប់រំកាយ និងកីឡា ឆ្នាំ២០១៩ និងលើកទិសដៅការងារសម្រាប់ឆ្នាំ២០២០ ដែលរៀបចំឡើងដោយអគ្គនាយកដ្ឋានកីឡា ចាប់ពីថ្ងៃទី០៣-០៤ ខែកុម្ភៈ ឆ្នាំ២០២០ ក្នុងនោះមានសិក្ខាកាម សរុបប្រមាណ ៣០០នាក់ មកពីអង្គភាពជំនាញក្រោមអគ្គនាយកដ្ឋានកីឡា សហព័ន្ធកីឡជាតិ អង្គភាពដៃគូ និងមន្ទីរ អប់រំ យុវជន និងកីឡារាជធានី-ខេត្ត។

ឯកឧត្តម ស សុខា បានមានប្រសាសន៍ថា៖ «ឆ្លើយតបទៅនឹងយុទ្ទសាស្ត្រចតុកោណតំណាក់កាលទី៤ ក្រសួងអប់រំ យុវជន និងកីឡា ប្តេជ្ញាសម្រេចឲ្យបាននូវមុំមួយក្នុងចំណោមមុំទាំង៤ គឺ ( ការពង្រឹងគុណភាពអប់រំវិទ្យាសាស្ត្រ និងបច្ចេកវិទ្យា ) ដោយផ្តល់អាទិភាពលើ ការយកចិត្តទុកដាក់លើគ្រូបង្រៀន ការពង្រឹងវិសាលភាពសាលារៀនគ្រប់កម្រិត ការពង្រឹងអធិការកិច្ច គ្រប់ជ្រុងជ្រោយលើការគ្រប់គ្រងសាលារៀន ការជំរុញការអប់រំបច្ចេកទេស នៅមធ្យមសិក្សាទុតិយភូមិ ការអប់រំបំណិនឲ្យស្របតាមទីផ្សារការងារ ការអភិវឌ្ឍកម្មវិធីសិក្សា និងសៀវភៅសិក្សាគោលគ្រប់ជ្រុងជ្រោយ និងការត្រៀមប្រកួតកីឡាស៊ីហ្គេម ឆ្នាំ២០២៣។»

លោកបានបន្តថា៖ «ទន្ទឹមនឹងនេះក្នុងអង្គសន្និបាត ឆ្នាំសិក្សា២០១៨-២០១៩ កន្លងមក ឯកឧត្តម បណ្ឌិតសភាចារ្យរដ្ឋមន្ត្រី បានដាក់ចេញយុទ្ធសាស្រ្តកំណែទម្រង់លើវិស័យអប់រំកាយ និងកីឡា ចំនួនដប់ចំនុច ដូចជា៖ ការរៀបចំផែនការសកម្មភាពរយៈពេល ៥ឆ្នាំ ដើម្បីអនុវត្តគោលនយោបាយជាតិស្តីពីការអភិវឌ្ឍវិស័យអប់រំកាយ និងកីឡា និងរៀបចំកែទម្រង់ការប្រកួតកីឡាជាតិស្របតាមស្តង់ដារកីឡាស៊ីហ្គម ការសិក្សាលើវិញ្ញាសាកីឡាសក្តានុពល ហើយផ្តល់អាទិភាពទៅលើប្រភេទនិងវិញ្ញាសាកីឡាទាំងនោះ ការសិក្សាអំពីភាពខ្លាំងនៃប្រភេទកីឡា និងវិញ្ញាសានីមួយៗរបស់ប្រទេសអាស៊ាន ការបំពាក់សម្ភារហ្វឹកហាត់លើប្រភេទនិងវិញ្ញាសាកីឡាអាទិភាព និងការផ្តល់ថវិកាគាំទ្រដល់សហព័ន្ធ ការលើកកម្ពស់កីឡាប្រពៃណីតាមរយៈកីឡាជាតិលើកទី៣ ការបង្កើត ពង្រឹង និងពង្រីកសមាគម ក្លឹប និងការជំរុញសកម្មភាពកីឡាឲ្យបានផុសផុល។»

លោករដ្ឋលេខាធិការបានបន្ថែមថា ការពិភាក្សាជាមួយនាយកដ្ឋានបុគ្គលិកក្នុងការបែងចែកគ្រូអប់រំកាយ និងកីឡាទៅបម្រើការងារតាមរាជធានី-ខេត្ត ឲ្យបានគ្រប់គ្រាន់ ការបណ្តុះបណ្តាលកីឡាករថ្នាល ដោយមានការតាមដាន និងវាយតម្លៃបច្ចេកទេសត្រឹមត្រូវ ពង្រឹងការអប់រំកាយ និងកីឡាក្នុងសាលារៀនដោយយកចិត្តទុកដាក់លើការពង្រាយគ្រូ ការអនុវត្តម៉ោងកីឡា ការប្រែក្លាយពីការអប់រំកាយទៅជាកីឡា ការបញ្ជា្របការអប់រំកាយ និងកីឡានៅតាមសាលាគរុកោសល្យ និងការពង្រីកការអប់រំកាយ និងកីឡានៅក្រៅសាលារៀនដោយយកចិត្តទុកដាក់លើកទីលាន ការជំរុញការហាត់ប្រាណ ការបង្កើតក្លឹបកីឡានៅតាមខេត្ត៕

 

រូបភាព៖ អគ្គនាយកដ្ឋានកីឡា

អត្ថបទ៖ វ៉ាន្នី

មតិយោបល់