ប្រកួតកីឡាហែលទឹកជើងឯកជាតិឆ្នាំ២០១៨នេះ មានកីឡាករ កីឡាការិនី ១២០នាក់ចូលរួម

នូ មករា November 2, 2018


ភ្នំពេញ៖ ការប្រកួតកីឡាហែលទឹកជ្រើសរើសជើងឯកថ្នាក់ជាតិឆ្នាំ២០១៨ ដែលមានរយៈពេល៣ថ្ងៃនឹងប្រព្រឹត្តទៅនៅរសៀលថ្ងៃទី១ ដល់ថ្ងៃទី៣ ខែវិច្ឆិកា ឆ្នាំ២០១៨ នាអាងហែលទឹកនៃពហុកីឡដ្ឋានជាតិមរតកតេជោដោយមានកីឡាករ-កីឡាការិនីចំនួន១២០ មកពី៧ក្លិបចូលរួមគឺ ក្លិបក្រសួងមហាផ្ទៃ ក្លិបក្រសួងសាធារណការ និងដឹកជញ្ជូន ក្លិបក្រសួងសេដ្ឋកិច្ច និងហិរញ្ញវត្ថុ ក្លិបក្រសួងព័ត៌មាន ក្លិបនាគរាជខេត្តកំពង់ចាម ក្លិបមច្ឆានុប និងសាលាខេនវីដអន្តរជាតិសិង្ហបុរី ។
 
លោក ហែម គិរី អគ្គលេខាធិការនៃសហព័ន្ធ ខ្មែរកីឡាហែលទឹក បានប្រាប់ឲ្យដឹងថា សម្រាប់ការប្រកួតនេះ យើងបែងចែក តាម កម្រិតអាយុ របស់កីឡាករ-កីឡាការិនី រួមមាន ផ្នែកបុរសក្របខណ្ឌក-២ និងផ្នែកនារីក្របខណ្ឌក២ (អាយុក្រោម១៨ ឆ្នាំ គិត ត្រឹមថ្ងៃប្រកួត កម្រិតទី២) និងផ្នែកបុរសក្របខណ្ឌក-១ និងផ្នែកនារីក្របខណ្ឌក១ (ក្រុមកីឡាករ-កីឡាការិនី ជម្រើសជាតិ ឬជំនាញ)។ កីឡាករម្នាក់អាចមានសិទ្ធិប្រកួត បានចំនួន ៤វិញ្ញាសារួមមានវិញ្ញាសាហែល បណ្តាក់មួយវិញ្ញាសា និងវិញ្ញាសា ហែលឯកជន ៣វិញ្ញាសា។ លោកបានបន្តថា ការប្រកួតឆ្នាំនេះមាន១៩វិញ្ញសា គឺផ្នែកនារីក្របខណ្ឌក-២ មាន៤វិញ្ញសា រួមមានហែលទឹកសេរី ៥០ម៉ែត្រ ហែលទឹកកង្កែប ៥០ម៉ែត្រ ហែលទឹកផ្ងារ ៥០ម៉ែត្រ ហែលទឹកមេអំបៅ៥០ម៉ែត្រ ។
ចំពោះផ្នែកបុរសក្របខណ្ឌក-២ មាន៤វិញ្ញសា ដែររួមមានហែលទឹក១០០ម៉ែត្រ ហែលទឹកកង្កែប១០០ម៉ែត្រ ហែលទឹកផ្ងារ ១០០ម៉ែត្រ ហែលទឹកមេអំបៅ១០០ម៉ែត្រ ។ ចំពោះនារីក្របខណ្ឌក-១ មាន៤វិញ្ញសា រួមមានហែលទឹកសេរី ១០០ម៉ែត្រ ហែលទឹកកង្កែប១០០ម៉ែត្រ និងហែល ទឹក៤របៀបឯកត្តជន២០០ម៉ែត្រ និងហែលទឹកបណ្តាក់៤របៀប៤x១០០ម៉ែត្រ រីឯផ្នែកបុរសក្របខណ្ឌក-១ មាន៧វិញ្ញ សា រួមមានហែលទឹកសេរី២០០ម៉ែត្រ ហែលទឹកកង្កែប២០០ ម៉ែត្រ ហែលទឹកកង្កែប១០០ម៉ែត្រ ហែលទឹកផ្ងារ ១០០ម៉ែត្រ ហែលទឹកមេអំបៅ១០០ម៉ែត្រ និងហែលទឹក៤របៀបឯកត្តជន ២០០ ម៉ែត្រ និងហែលទឹកបណ្តាក់៤របៀប៤x១០០ម៉ែត្រ ៕
អត្ថបទ៖ វ៉ាន្នី

មតិយោបល់