ទោះមិនបានមេដាយនៅសុីហ្គេម តែកាយសម្ព័ន្ធកម្ពុជាលេចធ្លោគួរឲ្យកត់សម្គាល់!

នូ មករា August 31, 2017


ភ្នំពេញ៖ លោកណយ ផាន់ណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានមានប្រសាសន៍៖ «កាយសម្ព័ន្ធកម្ពុជាលេចធ្លោនៅម៉ាឡេសុី បើទោះបីចាញ់សុីហ្គេមក៏ពិតមែន» ។ លោកបានថ្លែងបែបនេះ បន្ទាប់ពីលោក និងកីឡាករ សំ រីម បានត្រលប់ពីព្រឹត្តិការណ៍ប្រកួតកីឡាស៊ីហ្គេមលើកទី២៩ នៅប្រទេសម៉ាឡេស៊ីកាលពីពេលថ្មីៗនេះ ។ លោកបានបន្ថែមថា កីឡាករកម្ពុជាមានភាពលេចធ្លោក្នុងចំណោម ១១ប្រទេសនៅក្នុងព្រឹត្តិការណ៍នោះ បើទោះបីជាមិនឈ្នះមេដាយក៏ដោយ។

លោកសង្កេតឃើញថា កីឡាករសំ រីម មានការកើនឡើងបច្ចេកទេសល្អប្រសើរណាស់នៅក្នុងព្រឹត្តិការណ៍ប្រកួតនោះ ព្រោះនៅក្នុងចំណោមអត្តពលិក ៣២នាក់ដែលប្រកួតក្នុងវិញ្ញាសាសេះលោត កម្ពុជាទទួលបានចំណាត់ថ្នាក់ទី១៣ ដែលជាចំណាត់ថ្នាក់ត្រៀមចូលទៅវគ្គពាក់កណ្ដាលផ្ដាច់ព្រ័ត្រ និង ផ្ដាច់ព្រ័ត្រ ហើយបើប្រៀបធៀបពិន្ទុរបស់កីឡាកររូបនេះពីការប្រកួតស៊ីហ្គេមនៅប្រទេសសិង្ហបុរីកាលពីឆ្នាំ២០១៥ មកដល់ឆ្នាំ២០១៧ គឺមានការខុសគ្នាច្រើន នេះដោយសារតែសហព័ន្ធបានបញ្ជូនអត្តពលិករបស់ខ្លួនទៅហ្វឹកហាត់នៅប្រទេសចិនក្នុងរយៈពេល ៣ខែមុនស៊ីហ្គេមម៉ាឡេស៊ីចាប់ផ្ដើមប្រកួតទើបធ្វើឲ្យរូបគេធ្វើបានល្អបែបនេះ។

លោកបានបន្តថា៖ «យើងបានឃើញថាមានប្រទេសមួយចំនួនដែលជំនាញៗ និងបានដាក់អត្តពលិករបស់គេជាក្រុមខ្លះ ៥ ទៅ៦នាក់ហើយក្នុងចំណោមនោះ ពួកគេបានប្រកួតចាញ់កម្ពុជាយើងដូចជា ថៃ ឥណ្ឌូនេស៊ី និង ម៉ាឡេស៊ី ហើយក្នុងចំណោមកីឡាករដែលឈរចំណាត់ថ្នាក់លើយើងនោះមានតែ ១២នាក់ប៉ុណ្ណោះ គឺមាន វៀតណាម ហ្វីលីពីន ម៉ាឡស៊ី ដោយក្នុងវិញ្ញសាសេះលោតមួយនេះមានកីឡាករចូលរួម ៣២នាក់ ។ ធម្មតារឿងកីឡាកាយសម្ព័ន្ធកាលណាលឺថាបានទទួលការហ្វឹកហាត់នៅប្រទេសចិន គឺប្រទេសផ្សេងទៀតមានការបារម្ភខ្លាំងដោយសារតែប្រទេសចិនជាប្រទេសមួយដែលខ្លាំង និង ជំនាញជាងគេនៅក្នុងពិភពលោកផ្នែកកីឡានេះ ម្យ៉ាងទៀតអត្តពលិកដែលធ្លាប់ទៅហ្វឹកហាត់នៅទីនោះរយៈពេលវែងចាប់ពី ២ឆ្នាំឡើងទៅសុទ្ធតែប្រកួតឈ្នះមេដាយទាំងអស់។ ជាងនេះទៅទៀតក្នុងពេលហ្វឹកហាត់ត្រៀមប្រកួតជាមួយនឹងបណ្ដាប្រទេសផ្សេងទៀត នៅក្នុងព្រឹត្តិការណ៍ស៊ីហ្គេមនោះ គេបានដេញដោលសួរកម្ពុជាយើងច្រើន ពេលឃើញបច្ចេកទេសនៃការលោតរបស់យើងបានល្អដោយបានសួរថា អ្នកឯងបានទៅហាត់នៅចិនមែនទេ?» ។

លោកបានបន្ថែមថា៖ «បើទោះបីលទ្ធផលយើងមិនបានទទួលមេដាយជូនជាតិ ប៉ុន្តែលទ្ធផលផ្នែកកីឡាកាយសម្ព័ន្ធយើងទទួលបានមានការកើនឡើងទាំងបច្ចេកទេស និងលទ្ធផលពិន្ទុ ថែមទាំងមានការចាប់អារម្មណ៍ច្រើនពីបណ្ដាប្រទេសដែលចូលរួមប្រកួត ជាពិសេសគឺតំណាងសហព័ន្ធកីឡាកាយសម្ព័ន្ធ អន្តរជាតិ ដែលបានកោតសសើរដល់កម្ពុជាថាមានការរីកចម្រើនលឿន»។ លោកបានបញ្ជាក់ថា៖ «សម្រាប់ការចាញ់លើកនេះ លើប្រភេទកីឡាកាយសម្ព័ន្ធ គឺចាញ់ដោយពិតប្រាកដ មិនមានភាពអយុតិ្តធម៌ ឬមិនប្រក្រតីទៅលើអាជ្ញាកណ្ដាល និងចៅក្រមអ្វីនោះទេ គឺចាញ់ត្រង់សមត្ថភាពយើងមិនទាន់ដល់គេ។ តែទោះបីយ៉ាងណាក្ដី យើងរំពឹងថាឆ្នាំ២០១៩ ស៊ីហ្គេមនៅប្រទេសហ្វីលីពីន យើងសង្ឃឹមនឹងទទួលបានលទ្ធផលល្អច្រើនជាងនេះមិនខាន៕

អត្ថបទ៖ ប៉ាវឡុង ជីង

មតិយោបល់