KRE-League៖ បាយ័ន សងសឹកនាគខៀវឡើងវគ្គផ្ដាច់ព្រ័ត្រ បង្កក្ដីបារម្ភធំដល់ Khmer United

នូ មករា July 17, 2017


ភ្នំពេញ៖ ពានរង្វាន់បាល់ទាត់អាជីពចម្រុះ Khmer Real Estate League 2017 បានរកឃើញក្រុមដណ្ដើមបានកៅអីវគ្គផ្ដាច់ព្រ័ត្រហើយ រួមមានក្រុម Khmer United និងក្រុមបាយ័ន បន្ទាប់ពីក្រុមទាំងពីរ បានផ្ដួលគូប្រជែងរៀងៗខ្លួន នៅក្នុងវគ្គពាក់កណ្ដាលផ្ដាច់ព្រ័ត្រកាលពីល្ងាចមិញ ពិសេសគឺក្រុមកីឡាករបរទេសបាយ័ន ដែលបានវាយបកឈ្នះក្រុមនាគខៀវ(Blue Dragon) ធ្វើឲ្យបេក្ខភាពគូប្រជែងវគ្គផ្ដាច់ព្រ័ត្រក្រុម Khmer United មានការព្រួយបារម្ភទៀតផង ។
សម្រាប់លទ្ធផលប្រកួតវគ្គពាក់កណ្ដាលផ្ដាច់ព្រ័ត្រ លើទីលានសាកលវិទ្យាល័យភូមិន្ទុភ្នំពេញកាលពីម្សិលមិញ ក្រុម Khmer United ដែលដឹកនាំដោយលោក គីម ហ៊ាង ស្ថាបនិកបង្កើតពានខាងលើ បានទម្លាក់ក្រុមនិស្ស័យ ដោយលទ្ធផល ៤-០ ខណៈកាលពីជួបគ្នាក្នុងវគ្គសន្សំពិន្ទុក្រុមម្ចាស់ពាននេះបានយកឈ្នះ ៣-១ ។ តែអ្វីដែលមិននឹកស្មាន គឺក្រុមបាយ័ន ដែលធ្លាប់ចាញ់ក្រុមនាគខៀវ ៣-១ កាលពីវគ្គសន្សំពិន្ទុ បែរជាអាចសងសឹកបានវិញ ដោយយកឈ្នះ ១-០ ដើម្បីឡើងវគ្គផ្ដាច់ព្រ័ត្រតែម្ដង ។
លោក ឌួង ធារិទ្ធ គ្រូជំនួយ និងជាកីឡាករក្រុម Khmer United ផងនោះ បានសម្ដែងក្ដីត្រេក ចំពោះការឈានទៅវគ្គផ្ដាច់ព្រ័ត្រជាថ្មី ។ តែយ៉ាងណាលោកក៏បានសម្ដែងការខកបំណង ចំពោះការមិនបានជួបក្រុមខ្លួនចង់ជួបនៅវគ្គផ្ដាច់ព្រ័ត្រផងដែរ ពោលគឺក្រុម Khmer United ចង់ជួបក្រុម Blue Dragon ជាងជួបក្រុមបាយ័ន ។ លោកថា ការជួបក្រុមបាយ័ន គឺជាបញ្ហាធំសម្រាប់ក្រុមខ្លួន ព្រោះបាយ័ន ប្រើកីឡាករបរទេសស្ទើរទាំងអស់ ខណៈ Khmer United ភាគច្រើនជាកីឡាករខ្មែរ ។
លោកបានលើកឡើងថា៖ «វាជាបញ្ហាធំ ដែលក្រុមយើង(Khmer United) ត្រូវជួបក្រុមបាយ័ននៅវគ្គផ្ដាច់ព្រ័ត្រ ព្រោះបាយ័ន ប្រើកីឡាករបរទេស ដែលមានកាយសម្បទា និងបច្ចេកទេសលេងល្អ ហើយថែមទាំងមាននាំចូលកីឡាករអាជីពពីក្លឹបលីគកំពូលស៊ីម៉ាក់ទៀតផង ។ រីឯកីឡាករ Khmer United មានមាឌតូចជាង តែយ៉ាងណាយើងនៅតែសង្ឃឹម ៦០% ទៅ ៧០% ក្នុងការគ្រងតំណែងជើងឯក ព្រោះក្រុមយើងក៏បានបន្ថែមកីឡាករអាជីពម្នាក់ និងកីឡាករបរទេសម្នាក់ បូករួមទាំងការប្ដេជ្ញាចិត្តរបស់សមាជិកក្រុមទាំងអស់ផងដែរ» ។
គួរបញ្ជាក់ថា មុននឹងជួបគ្នានៅវគ្គផ្ដាច់ព្រ័ត្រ នាថ្ងៃទី២២ ខែកក្កដាចុងសប្ដាហ៍នេះ ក្រុម Khmer United និងក្រុមបាយ័ន គឺធ្លាប់ជួបគ្នាក្នុងវគ្គសន្សំពិន្ទុម្ដងរួចមកហើយ ដែលបញ្ចប់ការប្រកួតដោយលទ្ធផលស្មើគ្នា ២-២ ។ ម្យ៉ាងវិញទៀត ទន្ទឹមនឹងការរកឃើញបេក្ខភាពគូប្រជែងវគ្គផ្ដាច់ព្រ័ត្រ គេក៏បានរកឃើញបេក្ខភាពត្រូវប្រជែងពានរង្វាន់ The Top-5 ប្រចាំព្រឹត្តិការណ៍នេះផងដែរ គឺក្រុមខេត្តកំពង់ចាម បានយកឈ្នះក្រុមណារីតា ៦-២ ឡើងទៅជួបក្រុម V.Train ដែលបានយកឈ្នះក្រុម Avatar ដោយលទ្ធផល ៣-០ ៕
អត្ថបទ៖ បុត្រា

 

មតិយោបល់

ការប្រកួតកីឡាបាល់ទះ Leo Cup National Volleyball 2015 ផ្តើមរដូវកាលថ្មីជាមួយនឹងការគាំទ្រទ្វេដង!

ពីមួយឆ្នាំទៅមួយឆ្នាំវិស័យកីឡា បានទទួលបានការគាំទ្រពីសំណាក់ប្រិយមិត្ត នៅទូទាំងព្រះរាជាណាចក្រកម្ពុជាគួរឱ្យកត់សម្គាល់ ជាមួយគ្នានេះដែរ … អានបន្ត

ផលិតកម្មថោនទទួលការព្រមាន ៦ចំណុចពីក្រសួងវប្បធម៌ក្រោយចេញបទ «ជីវិតអ្នកប្រដាល់»

ភ្នំពេញ៖ បទចម្រៀងដែលមានចំណងជើងថា «ជីវិតអ្នកប្រដាល់» ដែលច្រៀងដោយលោក … អានបន្ត