AFC Cup៖ តើបឹងកេត អាចយក ៣ពិន្ទុពីក្រុមជើងខ្លាំងមីយ៉ាន់ម៉ាបានទៀតទេ?

នូ មករា April 4, 2017


ភ្នំពេញ៖ ក្រុមបាល់ទាត់បឹងកេតអង្គរ បានធ្វើដំណើរទៅដល់ទីក្រុងយ៉ាំងហ្គោនហើយ ដើម្បីត្រៀមប្រកួតជើងទី២ ជាមួយក្រុមម្ចាស់ផ្ទះមីយ៉ាន់ម៉ា គឺក្រុម Magwe FC នៅក្នុងពូលF នៃវគ្គជម្រុះពានរង្វាន់ AFC Cup 2017 វេលាម៉ោង ៤រសៀល(ម៉ោងនៅកម្ពុជា) ថ្ងៃទី០៥ ខែមេសាស្អែកនេះ នៅកីឡដ្ឋាន Youth Training Centre ។

កាលពីជួបគ្នាជើងទី១ លើទីលានពហុកីឡដ្ឋានជាតិ រាជធានីភ្នំពេញក្រុមបឹងកេតអង្គរ បានយកឈ្នះក្រុម Magwe FC ទាំងប្រផិតប្រផើយដោយលទ្ធផល ១-០ កាលពីថ្ងៃទី១៤ ខែមីនាកន្លងទៅ ។ ដូច្នេះចាំអ៊ុតទាំងអស់គ្នា តើក្រុមជើងឯកលីគកំពូលកម្ពុជា ២ជំនាន់បឹងកេតអង្គរ អាចបន្ដយកបាន ៣ពិន្ទុពីក្រុមជើងខ្លាំងរបស់មីយ៉ាន់ម៉ាទៀត ឬក៏យ៉ាងណា?

លោក John Mcglynn គ្រូបង្វឹកក្រុមបឹងកេតអង្គរ ធ្លាប់បានលើកឡើងក្នុងសន្និសីទក្រោយចប់ការប្រកួតជើងទី១ ថា លោកមិនទាន់អស់សង្ឃឹមនោះទេ បើទោះបីបឹងកេតឆ្លងកាត់ ៣ប្រកួតទើបរកបាន ៣ពិន្ទុកដ៏ដោយ ហើយលោកនឹងព្យាយាមធ្វើឲ្យបានល្អ ដើម្បីដឹកនាំក្រុមបាល់ទាត់តំណាងប្រទេសកម្ពុជានេះ កសាងកេរ្ដិ៍ឈ្មោះលើឆាកអន្ដរជាតិ ពិសេសគឺលោកនឹងជំរុញកូនធ្វើឲ្យបានល្អបន្ថែមទៀត ដើម្បីយកឈ្នះ Magwe ។

គួរបញ្ជាក់ថា សម្រាប់លទ្ធផល ៣ប្រកួតដូចគ្នាកន្លងទៅ ក្រុមបឹងកេតអង្គរប្រកួតបើកឆាកពូលF ចាញ់ក្រុម Johor Darul Ta’zim នៅក្រៅដីដោយលទ្ធផល ៣-០ និងបន្តចាញ់ Global FC ក្នុងផ្ទះដោយលទ្ធផល ២-០ មុនយកឈ្នះក្រុម Magwe ១-០ ក្នុងផ្ទះ ។ រីឯក្រុម Magwe ក្រៅពីចាញ់ក្រុមបឹងកេត គឺចាញ់ក្រុម Global FC ១-០ ក្នុងផ្ទះ និងស្មើក្រុម Johor Darul Ta’zim នៅលើទឹកដីរបស់ខ្លួន ។

នៅថ្ងៃជាមួយគ្នានោះដែរ ក្រុម Global FC របស់ហ្វីលីពីន ក៏ត្រូវបើកទ្វារកីឡដ្ឋាន Rizal Memorial ទទួលក្រុមកំពូលតារាង Johor Darul Ta’zim របស់ម៉ាឡេស៊ី នៅក្នុងជំនួបជើងទី២ ផងដែរ ខណៈជើងទី១ ក្រុម Johor បានលត់ក្រុមជើងខ្លាំងហ្វីលីពីននេះ ៤-០ ។ បច្ចុប្បន្នក្រុម Johor កំពុងឈរកំពូលតារាង និងមាន ៧ពិន្ទុ ខណៈក្រុម Global ឈរលេខ២ និងមាន ៦ពិន្ទុ រីឯក្រុមបឹងកេតឈរលេខ៣ និងមាន ៣ពិន្ទុ ៕

អត្ថបទ៖ បុត្រា

មតិយោបល់

ការប្រកួតកីឡាបាល់ទះ Leo Cup National Volleyball 2015 ផ្តើមរដូវកាលថ្មីជាមួយនឹងការគាំទ្រទ្វេដង!

ពីមួយឆ្នាំទៅមួយឆ្នាំវិស័យកីឡា បានទទួលបានការគាំទ្រពីសំណាក់ប្រិយមិត្ត នៅទូទាំងព្រះរាជាណាចក្រកម្ពុជាគួរឱ្យកត់សម្គាល់ ជាមួយគ្នានេះដែរ … អានបន្ត

ផលិតកម្មថោនទទួលការព្រមាន ៦ចំណុចពីក្រសួងវប្បធម៌ក្រោយចេញបទ «ជីវិតអ្នកប្រដាល់»

ភ្នំពេញ៖ បទចម្រៀងដែលមានចំណងជើងថា «ជីវិតអ្នកប្រដាល់» ដែលច្រៀងដោយលោក … អានបន្ត