គ្រូបង្វឹកថ្មីរបស់ក្លិបព្រៃវែង ក្លាយជាគ្រូជនជាតិថៃ ទី៣ ដែល​មកធ្វើការនៅលីគកំពូលកម្ពុជា

មាស សុផាណារ៉ុង February 3, 2021


 

ព្រៃវែង៖ ក្រុមចំណូលថ្មីដែលទើបនឹងបានឡើងលីគកំពូលកម្ពុជា រដូវកាល២០២១ កាលពីពេលថ្មីៗនេះ ក្លិបបាល់ទាត់ខេត្តព្រៃវែង នាល្ងាចថ្ងៃទី០២ ខែកុម្ភៈ ឆ្នាំ២០២១ ម្សិលមិញបានធ្វើការប្រកាសតែងតាំងគ្រូបង្គោលថ្មីរបស់ខ្លួនសញ្ជាតិថៃ លោក Thongchai Rungreangles និងត្រូវបានគេចាត់ទុកថា ជាគ្រូជនជាតិថៃ ទី៣ ដែល​មកធ្វើការនៅលីគកំពូលកម្ពុជា។

លោក Thongchai Rungreangles គឺជាគ្រូ​បង្វឹកដែលសញ្ញាបត្រ​កម្រិត UEFA Pro License  បច្ចុប្បន្នលោកមានវ័យ ៣៤ឆ្នាំ និងធ្លាប់ធ្វើជាគ្រូជំនួយជម្រើសជាតិថៃ អាយុក្រោម ១៩ឆ្នាំ កាលពីឆ្នាំ២០១៥ ហើយឆ្នាំ២០១៨ លោកកាន់តំណែងជាគ្រូបង្វឹកយុវជនក្លិប Thailand Bangkok Glass ដែលបច្ចុប្បន្នជាក្លិបកំពុងឡើងជើងខ្លាំងនៅថៃ BG Pathum United។

លោកក៏ធ្លាប់ជាគ្រូបង្វឹកជម្រើសជាតិថៃ អាយុក្រោម១៦ឆ្នាំ លេងក្នុងពានរង្វាន់ 2018 AFF U-16 Youth Championship ដែលឈ្នះជើងឯករង និងពាន 2018 AFC U-16 Championship ឡើងទៅវគ្គចែកពូល នៅពាក់កណ្ដាលឆ្នាំ២០១៨ ដល់ចុងឆ្នាំ ២០១៩ ផងដែរ។

ការមកដល់លីគកំពូលកម្ពុជា របស់លោក Thongchai Rungreangles ធ្វើឲ្យលោកក្លាយជាគ្រូបង្វឹកជនជាតិថៃទី៣ ដែលដឹកនាំក្រុមប្រកួតក្នុងពានរង្វាន់ផ្លូវការនៅកម្ពុជា បន្ទាប់ពី លោក Apisit Im Amphai ដែលធ្លាប់ដឹកនាំ ភ្នំពេញអ៊ិមផាយអឺរ (បច្ចុប្បន្ន ភ្នំពេញក្រោន) ក្លិបបឹងកេត និងបច្ចុប្បន្នកំពុងដឹកនាំ ក្លិបកោះកុងអេហ្វស៊ី ជាក្រុមលេងនៅក្នុងលីគទី២ កម្ពុជា និងបន្ទាប់ពី លោក Ekapob Potisai ដែលកំពុងដឹកនាំក្លិបគីរីវង់សុខសែនជ័យ មានមូលដ្ឋាននៅខេត្តតាកែវ៕

លោក Apisit Im Amphai

លោក Ekapob Potisai

មតិយោបល់