ឆ្នាំ២០២១ កម្ពុជា មានអាជ្ញាកណ្ដាលកម្រិតពិភពលោក (FIFA) ៩នាក់ ដដែល

មាស សុផាណារ៉ុង January 19, 2021


 

ស្វីស៖ សហព័ន្ធ​កីឡាបាល់ទាត់​ពិភពលោក ហៅ​កាត់​ថា (FIFA) កាលពីពេលថ្មីៗនេះ បានធ្វើការ​បង្ហាញ​ជា​ផ្លូវការ​នូវ​បញ្ជី​ឈ្មោះ​មន្ត្រី​អាជ្ញាកណ្ដាល និង​មន្ត្រី​ជំនួយ​របស់​ប្រទេស​ជា​សមាជិក ដែល​ទទួលស្គាល់​ដោយ FIFA ក្នុង​ឆ្នាំ២០២១ ដើម្បី​ត្រៀម​បំពេញភារកិច្ច​ក្នុង​ឆ្នាំ​នេះ ដោយ​ក្នុង​នោះ​កម្ពុជា មាន​សមាសភាព​អាជ្ញាកណ្ដាល ៩​រូប​ដដែល ដូចទៅនឹងឆ្នាំ២០២០។​

​យោងតាមការបញ្ជាក់នៅលើវិបសាយផ្លូវការរបស់ fifa.com មន្ត្រី​អាជ្ញាកណ្ដាល​ទាំង ៩​រូប​នោះ​រួមមាន ​មន្ត្រី​អាជ្ញាកណ្ដាល​កាត់​សេចក្តី (Referee) ៣​រូប គឺលោក ជី សាម​ឌី​, លោក ឃួន វីរៈ និង​លោក លឹម ប៊ុនធឿន។

ដោយឡែកសម្រាប់​មន្ត្រី​ជំនួយការ​អាជ្ញាកណ្តាល (Assistant Referee) មាន​៥​រូប ​រួមមាន លោក ចេង ច័ន្ទដារ៉ា​, លោក គឹម​ស៊ី ពិសាល​, លោក សៀន សុភ័ក្ត្រ​, លោក សុន ច័ន្ទ​ភា​រិ​ទ្ធិ និង​លោក ស៊ុន ដារ៉ាវុធ ខណៈលោក សន វី​ហ្ស៊ែ​ល ជា​មន្ត្រី​អាជ្ញាកណ្ដាល​បាល់ទាត់​ក្នុង​សាល (Futsal Referee)។​​

ដោយឡែកក្រុមមន្ត្រីអាជ្ញាកណ្ដាល ២ប្រភេទទៀត គឺអាជ្ញាកណ្ដាលក្នុងបន្ទប់វីដេអូ (Video Match Official) ពាក់ព័ន្ធនឹងប្រព័ន្ធ VAR និងអាជ្ញាកណ្ដាលលើឆ្នេរខ្សាច់ (Beach Soccer Referee) កម្ពុជា ពុំទាន់មានក្នុងកម្រិត FIFA នៅឡើយទេ។

បញ្ជាក់ថា ការ​ទទួល​ស្គាល់​ដោយ FIFA សម្រាប់​មន្ត្រី​អាជ្ញាកណ្ដាល​ខាងលើនេះ គឺ​មានន័យថា ពួកគេ​មាន​អាទិភាព​ក្នុងការ​ជ្រើសរើស​ជា​មន្ត្រី​សម្រាប់​បម្រើការ​ដល់​ការប្រកួត​លក្ខណៈ​អន្តរជាតិ​ដែល​រៀបចំឡើង​ដោយ សហព័ន្ធ​បាល់ទាត់​អាស៊ាន (AFF)​, អាស៊ី (AFC) ឬពិភពលោក (FIFA)៕

មតិយោបល់