កាលវិភាគថ្មីនៃវគ្គជម្រុះបាល់ទាត់ពិភពលោក (ទ្វីបអាស៊ី) ចេញជាផ្លូវការ

មាស សុផាណារ៉ុង January 14, 2021


 

អាស៊ី៖ សហព័ន្ធកីឡាបាល់ទាត់ទ្វីបអាស៊ី (AFC) ថ្មីៗនេះ បានបង្ហាញពីកាលវិភាគថ្មី ដើម្បីបន្តការប្រកួតបាល់ទាត់វគ្គជម្រុះបាល់ទាត់ពិភពលោក ប្រចាំទ្វីបអាស៊ី (2022 FIFA World Cup qualification – AFC Second Round) ដែលបានលើកពេល ២ដងរួចមកហើយ។

យោងតាមកាលវិភាគថ្មីដែលរៀបចំដោយ AFC កម្មវិធីប្រកួតថ្មីដែលនៅសេសសល់ ៤ប្រកួតទៀត គ្រោងធ្វើដោយបែងចែកជា ២លើកផ្សេងពីគ្នា ពោលគឺនៅចន្លោះថ្ងៃទី២៤ ដល់ថ្ងៃទី៣០ ខែមីនា បន្ទាប់មកមាននៅចន្លោះថ្ងៃទី០៧ ដល់ថ្ងៃទី១៥ ខែមិថុនា ឆ្នាំ២០២១។

កាលបរិច្ឆេទថ្ងៃជាក់លាក់បានបង្ហាញយ៉ាងដូច្នេះ៖

  • ប្រកួតទី៥ គឺគ្រោងនឹងធ្វើនៅថ្ងៃទី២៥ ខែមីនា ឆ្នាំ២០២១
  • ប្រកួតទី៦ គឺគ្រោងនឹងធ្វើនៅថ្ងៃទី៣០ ខែមីនា ឆ្នាំ២០២១
  • ប្រកួតទី៧ គឺគ្រោងនឹងធ្វើនៅថ្ងៃទី០៧ ខែមិថុនា ឆ្នាំ២០២១
  • ប្រកួតទី៨ គឺគ្រោងនឹងធ្វើនៅថ្ងៃទី១៥ ខែមិថុនា ឆ្នាំ២០២១

ចំពោះការប្រកួតជុំទី២ វគ្គជម្រុះបាល់ទាត់ពិភពលោក (2022 FIFA World Cup qualification – AFC Second Round) ត្រូវបានពន្យាពេលដល់ទៅ ២លើក ដោយលើកដំបូងគឺនៅខែមីនា និងមិថុនា គម្រោងលើកទៅប្រកួតខែតុលា និងវិច្ឆិកា ឆ្នាំ២០២០ តែក្រោយមកទៀតក៏សម្រេចលើកក្នុងអំឡុងខែតុលា និងវិច្ឆិកា មកប្រកួតនៅក្នុងអំឡុងខែមីនា និងមិថុនា ឆ្នាំ២០២១ នេះសារជាថ្មីក្នុងស្ថានភាពដូចគ្នាដោយសារជំងឺកូវីដ-១៩ ខណៈក្រុមគោព្រៃកម្ពុជា នៅសល់ ៣ប្រកួតក្នុងដៃ ហើយកម្មវិធីផ្លាស់ប្ដូររួមមាន កម្ពុជា ត្រូវជួបក្រុមជម្រើសជាតិបារ៉ែន បន្ទាប់ត្រូវទទួលអ៊ីរ៉ង់ និងប្រកួតចុងក្រោយរបស់កម្ពុជា ត្រូវជួបអ៊ីរ៉ាក់ ដូចកម្មវិធីខាងក្រោម៖

  • ថ្ងៃទី២៥ ខែមីនា ឆ្នាំ២០២១: បារ៉ែន ប្រកួតជាមួយ កម្ពុជា
  • ថ្ងៃទី៣០ ខែមីនា ឆ្នាំ២០២១: កម្ពុជា ប្រកួតជាមួយ អ៊ីរ៉ង់
  • ថ្ងៃទី០៧ ខែមិថុនា ឆ្នាំ២០២១: អ៊ីរ៉ាក់ ប្រកួតជាមួយ កម្ពុជា

អ៊ីរ៉ាក់ គឺជាក្រុមនាំមុខគេក្នុងពូល ក្រោយប្រកួត ៥ដង មិន ១១ពិន្ទុ តាមពីក្រោយដោយក្រុមលេខ២ បារ៉ែន ចំនួន ២ពិន្ទុ​ (មាន ៩ពិន្ទុក្នុងដៃ) ខណៈអ៊ីរ៉ង់ ឈរនៅលេខ៣ មាន ៦ពិន្ទុ ប៉ុន្តែសល់ ១ប្រកួតក្នុងដៃ ខណៈ ហុងកុង (លេខ៤) កម្ពុជា (លេខ៥) ដែលអស់ឱកាសឡើងទៅជុំទី៣ នៃវគ្គជម្រុះបាល់ទាត់ពិភពលោក (World Cup) ទៅហើយនោះ នៅសល់ត្រឹមតែឱកាសប្រជែងធ្វើយ៉ាងណាឲ្យរួចផុតពីការប្រកួតជម្រុះពីវគ្គដំបូង (play-off round) ក្នុងពានជើងឯកអាស៊ី (AFC Asian Cup) ដើម្បីបានកៅអីមិនបាច់ជម្រុះ (បានចូលទៅវគ្គចែកពូល) តែប៉ុណ្ណោះ។

សូមបញ្ជាក់ថា ជំងឺកូវីដ-១៩ ដែលបានផ្ទុះឡើងកាលពីខែធ្នូ ឆ្នាំ២០១៩ បាននាំឲ្យការប្រកួតបាល់ទាត់ជុំវិញពិភពលោក ទាំងក្នុងស្រុក និងក្រៅស្រុកបានសម្រេចផ្អាក ក៏ដូចជាពន្យាពេលជាបន្តបន្ទាប់ ដើម្បីបង្ការការរីករាលដាលនៃវីរុសនេះ​៕

មតិយោបល់