CNCC ដាក់ចេញវិធានការណែនាំសុវត្ថិភាព ៩ចំណុច ពេលលីគកំពូលកម្ពុជា ត្រលប់មកវិញ

មាស សុផាណារ៉ុង June 10, 2020


 

ភ្នំពេញ៖ នៅរសៀលថ្ងៃទី១០ ខែមិថុនា គណៈកម្មការប្រកួតបាល់ទាត់ជាតិកម្ពុជា (​CNCC) និងតំណាងក្រុមទាំង១៣ ក្នុងពានរង្វាន់លីគកំពូលកម្ពុជា បានបើកកិច្ចប្រជុំអំពីបច្ចេកទេសនៃការប្រកួត និងវិធានការណែនាំពីសុវត្ថិភាពដើម្បីទប់ស្កាត់ និងបង្ការជំងឺកូវីដ១៩ នៅក្នុងដំណើរការការប្រកួតឡើងវិញ។

ការប្រជុំរវាងគណៈកម្មការប្រកួតបាល់ទាត់ជាតិកម្ពុជា ជាមួយតំណាងក្លិបទាំង១៣ អំពីកម្មវិធីនិងបច្ចេកទេសនៃការប្រកួត ព្រមទាំងវិធានការណែនាំពីសុវត្ថិភាពដើម្បីទប់ស្កាត់ និងបង្ការជំងឺកូវីដ១៩ ត្រៀមលក្ខណក្នុងដំណើរការការប្រកួតឡើងវិញនៅថ្ងៃទី៤ និងទី៥ ខែកក្កដា និងគ្រោងបញ្ចប់នៅថ្ងៃទី២៤ និងទី២៥ ខែតុលា ដោយចាប់ផ្តើមឡើងវិញពីសប្តាហ៍ទី៦ ខណៈការប្រកួតត្រូវធ្វើឡើងដោយមិនមានអ្នកចូលរួមទស្សនាផ្ទាល់ ពោលមានត្រឹមតែកីឡាករ គ្រូបង្វឹក និងក្រុមការងារបច្ចេកទេសដែលពាក់ព័ន្ធត្រឹមតែ ១០០នាក់ប៉ុណ្ណោះដែលស្ថិតនៅក្នុងទីលានប្រកួត។

ចំណែកវិធានការណែនាំសុវត្ថិភាពដើម្បីបង្ការជំងឺកូវីដ១៩ នៅក្នុងដំណើរការការប្រកួត គឺបានបែងចែកជា ៩ចំណុច៖

  • ព័ត៌មានអំពី ជំងឺកូវីដ១៩
  • ដំណើរការចាប់ផ្តើមឡើងវិញ និងសណ្ឋានការប្រកួត
  • វិធានការអនុវត្តការពារដល់ក្រុម និងក្រុមការងារ
  • វិធានណែនាំសម្រាប់ករណីឃើញរោគសញ្ញាសង្ស័យ ឬលទ្ឋផលវិជ្ជមាននៃជំងឺកូវីដ១៩
  • វិធានណែនាំក្នុងដំណើរការរៀបចំការប្រកួត
  • វិធានណែនាំសម្រាប់ការងារផ្សព្វផ្សាយ
  • វិធានណែនាំការប្រកួតមិនមានអ្នកចូលទស្សនា
  • វិធានណែនាំសម្រាប់សកម្មភាពហ្វឹកហាត់របស់ក្លិប និងកីឡាករ

ក្នុងគោលបំណងស្របទៅតាមវិធានសុវត្ថភាពបង្ការជំងឺ​ Covid-19 របស់ក្រសួងសុខាភិបាល និងក្រសួងអប់រំ យុវជន និងកីឡា គណៈកម្មការប្រកួតបាល់ទាត់ជាតិកម្ពុជា បានដាក់វិធានការណែនាំសុវត្ថិភាពដើម្បីបង្ការជំងឺកូវីដ-១៩ នៅក្នុងដំណើរការការប្រកួត ដោយមាន ៩ចំណុចមុនដំណើរការសារជាថ្មីនៃពានរង្វាន់ Metfone Cambodian League 2020។ ដោយហេតុនេះហើយ ក្លិបទាំង១៣ រួមទាំងមន្ត្រីរៀបចំការប្រកួតទាំងអស់ត្រៀមចូលរួមពិនិត្យសុខភាព ដោយគណៈកម្មការប្រកួតបាល់ទាត់ជាតិកម្ពុជា ជាអ្នករៀបចំជាមួយក្រសួងសុខាភិបាល និងតម្រូវអោយមានការបាញ់ថ្នាំសម្លាប់មេរោគ នៅតាមបរិវេណនានានៅក្នុងកីឡដ្ឋានផងដែរ។

ពាក់ព័ន្ធនឹងការពិនិត្យសុខភាពនេះដែរ លោក ឈី កុលបុត្រា លេខាធិការប្រតិបត្តិ CNCC បញ្ជាក់ថា ប្រសិនបើរកឃើញបុគ្គលិក និងកីឡាករណាមួយមានអការៈមិនប្រក្រតី គឺអនុវត្តតាមគោលការណ៍របស់ក្រសួងសុខាភិបាល ដូចជាការធ្វើចត្តាឡីស័ក និងការពិនិត្យភ្លាមៗ។

ថ្នាក់ដឹកនាំដដែលបន្ថែមថា គណៈកម្មការប្រកួតបាល់ទាត់ជាតិកម្ពុជា នឹងដាក់កំហិតក្លិបទាំងអស់ អោយមានការតាមដានការពិនិត្យកម្ដៅជាប្រចាំយ៉ាងហោចណាស់ ២លើក មុនថ្ងៃប្រកួតដើម្បីដឹងច្បាស់ពីអាការៈ ថាតើមានភាពប្រក្រតី ឬអត់។ ចំណែករៀងរាល់ការប្រកួត កីឡាករ គ្រូបង្វឹក និងបុគ្គលិកទាំងអស់ ក៏ត្រូវឆ្លងកាត់ការត្រួតពិនិត្យកម្ដៅឡើងវិញម្តងទៀតជាលើកទី៣ មុនចូលទៅកាន់ទីលានប្រកួត ហើយក្នុងអំឡុងពេលប្រកួត គឺមិនអនុញ្ញាតអោយមានការចាប់ដៃ ការអោប (អបអរសាទរការទាត់បញ្ចូលទី)៕

 

ប្រភពអត្ថបទ និងរូបភាព៖ CNCC – គណៈកម្មការប្រកួតបាល់ទាត់ជាតិកម្ពុជា

មតិយោបល់