លោក Honda មិនអាចដឹកនាំ U-22 កម្ពុជា ប្រកួតក្នុងស៊ីហ្គេម ក្រោយចេញបញ្ជីឈ្មោះ ២០នាក់ចុងក្រោយ

មាស សុផាណារ៉ុង November 21, 2019

ភ្នំពេញ៖ សហព័ន្ធកីឡាបាល់ទាត់កម្ពុជា បានបង្ហាញបញ្ជីឈ្មោះកីឡាករជម្រើសជាតិកម្ពុជា អាយុក្រោម ២២ឆ្នាំ ចំនួន ២០នាក់ចុងក្រោយជាផ្លូវការ ដើម្បីត្រៀមចូលរួមប្រកួតព្រឹត្តិការណ៍កីឡាប្រចាំតំបន់អាស៊ីអាគ្នេយ៍ ( SEA Games 2019 ) ឆ្នាំ២០១៩ លើប្រភេទកីឡាបាល់ទាត់ វិញ្ញាសាបុរស ដែលហ្វីលីពីន ផ្ទាល់ធ្វើជាម្ចាស់ផ្ទះ នៅប៉ុន្មានថ្ងៃខាងមុខនេះ។

កីឡាករទាំង ២០នាក់នេះរួមមាន មកពីក្លឹបបាល់ទាត់នៅលីគកំពូលកម្ពុជា ដូចជាក្រសួងការពារជាតិ ( ២ នាក់ ), ភ្នំពេញក្រោន ( ៥នាក់ ), បឹងកេតអែហ្វស៊ី ( ៤នាក់ ), វិសាខា ( ៨នាក់ ) រួមទាំង យុវជនពីសាលាបាល់ទាត់ជាបាទី ១នាក់ផងដែរ។ ជាមួយគ្នាផងដែរជម្រើសជាតិកម្ពុជា អាយុក្រោម ២២ឆ្នាំ ក៏បានបញ្ជូលកីឡាករលើសអាយុ ២២ឆ្នាំ ២រូបផងដែរ ពោលគឺ កីឡាករ រ៊ឹង ប៊ុនហៀង របស់ក្រសួងការពារជាតិ និង កែវ សុខផេង របស់វិសាខា។

ចំពោះកីឡាករចំនួន ៨រូប ដែលត្រូវបានកាត់ចេញពីបញ្ជីចុងក្រោយជាមួយក្រុមជម្រើសជាតិឈុតធំរួមមាន សាវែង សំណាង, ប្រាក់ ធីវ៉ា (ភ្នំពេញក្រោន), លី វ៉ាហេទ (បឹង​កេត), ឈង់ ប៊ុនណាត (អង្គរថាយហ្គឺរ), សាន គីមហេង និង ទៀត គីមហេង (វិសាខា), ណារ៉ុង កក្កដា (ក្រសួងការពារជាតិ) និង ឃៀង ម៉េងហួរ (ព្រះខ័ន​រាជស្វាយរៀង)

បញ្ជីឈ្មោះកីឡាករ ទាំង២០រូបចុងក្រោយ៖

ជាមួយគ្នាផងដែរ យោងតាមបញ្ជីនេះ លោក Keisuke Honda ដែលជាអ្នកចាត់ការទូទៅក្រុមជម្រើសជាតិ និងមិនអាចចូលរួមដឹកនាំ U-22 កម្ពុជា បានឡើយ ដ្បិតការប្រកួតនេះ គឺជាការប្រកួតមិនចំថ្ងៃ FIFA Day ហើយស្របពេលដែលលោកត្រូវទៅចូលរួមហ្វឹកហាត់ជាមួយក្លឹបថ្មី Vitesse នៃលីគកំពូលហូឡង់។

យ៉ាងណាតួនាទី គឺត្រូវរ៉ាប់រងដោយគ្រូបង្គោល លោក Felix G.Dalmas រួមជាមួយ លោក ភា សុភ័ក្ត្រា និងកីឡាករ គួច សុកុម្ភៈ ជាគ្រូជំនួយ ស្របពេលដែលកីឡាករ អ៊ុំ វិចិត្រ ជាគ្រូអ្នកចាំទី។

សូមបញ្ជាក់ថា ក្រុមបាល់ទាត់ជម្រើសជាតិកម្ពុជា អាយុក្រោម ២២ឆ្នាំ ត្រូវបានចាប់ឆ្នោតចូលពូល A ក្នុងការប្រកួតព្រឹត្តិការណ៍កីឡាប្រចាំតំបន់អាស៊ីអាគ្នេយ៍ ( SEA Games 2019 ) នៅប្រទេសហ្វីលីពីន ជាមួយម្ចាស់ផ្ទះហ្វីលីពីន ម៉ាឡេស៊ី, មីយ៉ាន់ម៉ា និងទីម័រខាងកើត ហើយគ្រោងចាប់ផ្ដើមនៅថ្ងៃទី២៦ ខែវិច្ឆិកា នឹងបញ្ចប់នៅថ្ងៃទី១០ ខែធ្នូ ឆ្នាំ២០១៩។

ព្រឹត្តិការណ៍នេះ ស្ថានីយទូរទស្សន៍ហង្សមាស ( Hangmeas HD TV ) បានទទួលសិទ្ធិផ្សាយបន្តផ្ទាល់ការប្រកួតព្រឹត្តិការណ៍កីឡាអាស៊ីអាគ្នេយ៍ ( SEA Games 2019 ) លើប្រភេទកីឡាបាល់ទាត់ ផងដែរ៕

អត្ថបទ៖ ណារ៉ុង

មតិយោបល់