U15 កម្ពុជា បញ្ចប់ភារកិច្ចពីពាន AFF U15 Championship ដោយរកបានតែ ១ពិន្ទុ

មាស សុផាណារ៉ុង August 5, 2019


 

ថៃ៖ ក្រុមបាល់ទាត់ជម្រើសជាតិកម្ពុជាអាយុក្រោម ១៥ឆ្នាំ បានបញ្ចប់ភារៈកិច្ចរបស់ខ្លួនពីពានរង្វាន់ជើងឯកយុវជនអាស៊ីអាគ្នេយ៍ អាយុក្រោម១៥ឆ្នាំ ( AFF U-15 Championship 2019 ) ជាផ្លូវការហើយ ដោយរកបានតែ ១ពិន្ទុ បន្ទាប់ពីបន្តប្រកួតចាញ់ U-15 ឡាវ ក្នុងជំនួបទី៥ ប្រចាំពូល ​B នាល្ងាចថ្ងៃទី០៥ ខែសីហា ឆ្នាំ២០១៩ នេះ

ការប្រកួតនេះបានបញ្ចប់ទៅដោយលទ្ធផលឡាវ យកឈ្នះ កម្ពុជា ៣ទល់០ នៅលើទីលាន Institute of Physical Education Chonburi Campus 2 ( IPE2 )។

គ្រាប់​បាល់​ទាំង ៣​គ្រាប់ ​របស់ U15 ឡាវ កើតឡើង​នៅ​ក្នុង​វគ្គ​ទី​១ ចំនួន ២គ្រាប់​ពោល​ គឺ​ធ្វើបានដោយនៅ​នាទី​១៩ និងនៅនាទី២៨ និង​រក្សា​លទ្ធផល ២​ទល់​០ ត្រឹម​វគ្គ​ទី​១ ខណៈ​នៅ​វគ្គ​ទី​២ ​ឡាវ បាន​បន្ថែម មួយគ្រាប់​ទៀត ដែល​ធ្វើបាន​នៅ​នាទី​៨០+១ នាំ​ឲ្យ​ឡាវ រក​បាន ៧ពិន្ទុ​បន្ថែម បន្ត​ឈរ​​លេខ​៤ ក្នុង​តារាង​ពិន្ទុ​ប្រចាំ​ពូ​ល B ក្រោយ​ឈ្នះ ២​ប្រកួត​ ស្មើ១ និងចាញ់២។

បរាជ័យ​នេះ នាំ​ឲ្យ​កម្ពុជា បញ្ចប់ទៅដោយឈរនៅលេខ៥ ប្រចាំពូល B នេះ ដោយប្រកួត ៥ដង មិនដែលឈ្នះ ស្មើ១ និងចាញ់ ៤ មាន ១ពិន្ទុ ហើយគ្រោងនឹងត្រលប់មាតុប្រទេសវិញ នៅថ្ងៃស្អែកផងដែរ​៕

 

រូបភាព៖ សហព័ន្ធកីឡាបាល់ទាត់កម្ពុជា

អត្ថបទ៖ ណារ៉ុង

មតិយោបល់