ស្ថានីយ៍ទូរទស្សន៍ទាំងអស់ ត្រូវបានអនុញ្ញាតឲ្យបើកការប្រកួតប្រដាល់ឡើងវិញ

មាស សុផាណារ៉ុង April 8, 2020


 

ភ្នំពេញ៖ សហព័ន្ធកីឡាប្រដាល់គុនខ្មែរ បានសម្រេចអនុញ្ញាតឲ្យគ្រប់ស្ថានីយ៍ទូរទស្សន៍ទាំងអស់ ឲ្យបើកការប្រកួតប្រដាល់​ឡើងវិញហើយ ប៉ុន្តែជាការប្រកួតបិទទ្វារ ដោយមិនអនុញ្ញាតឲ្យមានអ្នកចូលទស្សនាផ្ទាល់ឡើយ។

ឯកឧត្តមឧត្តមសេនីយ៍ឯក តែម ម៉ឺន ប្រធានសហព័ន្ធប្រដាល់គុនខ្មែរ បានចុះហត្ថលេខាលើសេចក្ដីជូនដំណឹងស្ដីពីការអនុញ្ញាតឲ្យបណ្ដាគ្រប់ស្ថានីយ៍ទូរទស្សទាំងអស់បើកការប្រកួតប្រដាល់ឡើងវិញចាប់ពីថ្ងៃផ្សាយដំណឹងនេះតទៅ។

នេះជាការអនុញ្ញាតឲ្យបើកការប្រកួតដោយមានបម្រាមខ្លះៗ ដើម្បីការពារកុំឲ្យឆ្លងជំងឺកូវីដ១៩ នៅក្នុងបម្រាមនៃលិខិតអនុញ្ញាតនោះ គឺអនុញ្ញាតឲ្យប្រកួតដោយមានការផ្សាយបន្តផ្ទាល់បាន ប៉ុន្តែត្រូវយកចិត្តទុកដាក់ខ្ពស់តាមគោលការណ៍ណែនាំរបស់ក្រសួងសុខាភិបាល ចំពោះការថែទាំអនាម័យក្នុងពេលប្រកួត។ រាល់ការប្រកួតមិនត្រូវអនុញ្ញាតឲ្យទស្សនិកជនចូលទស្សនាដោយផ្ទាល់ឡើយ គឺមានតែគណៈកម្មការ, កីឡាករ​ និងអ្នកចាំបាច់​តែប៉ុណ្ណោះ ។

បញ្ជាក់ថា ថ្លែង​ក្នុង​ពិធី​សន្និសីទ​សារព័ត៌មាន​ពិសេស​ពាក់ព័ន្ធ​បច្ចុប្បន្ន​ភាព​ជំងឺ​ COVID-19​ កាលពីថ្ងៃទី០៧ ខែមេសា ម្សិលមិញនេះ​ សម្ដេចតេជោ ហ៊ុន សែន បាន​បញ្ជាក់​ថា​ ក្នុង​អំឡុង​ពេល​នេះ​ប្រជាពលរដ្ឋ​ក៏​ត្រូវ​ការ​មើល​ការ​សម្ដែង​ ការ​ប្រកួត​ប្រដាល់​ផ្សេងៗផង​ដែរ​នៅតាមផ្ទះ ដូច្នេះ​អាច​បន្ត​ប្រកួត​ដោយ​បិទ​ទ្វា​បាន។​ ព្រោះ​កម្មវិធី​ប្រដាល់​នេះ​មិន​ប្រើ​គ្នា​ច្រើន​នោះ​ទេ​ ហើយ​មួយ​វិញ​ទៀត​បើ​អ្នក​កើត​ COVID-19​ ក៏​គេ​មិន​ឲ្យ​ប្រកួត​ដែរ។​

គួររំលឹកថា ការផ្អាកការប្រកួតកន្លងមកនេះកីឡាករភាគច្រើនបានវិលត្រឡប់ទៅស្រុកកំណើតវិញដើម្បីប្រកបមុខរបរផ្សេងៗចិញ្ចឹមជីវិត ហើយពេលនេះដំណឹងនៃការបើកសង្វៀនប្រកួតឡើងវិញនោះគណៈកម្មការអាជ្ញាកណ្ដាលភាគច្រើនបានសម្ដែងក្ដីរីករាយយ៉ាងខ្លាំង ព្រោះអាចនាំឲ្យមានចំណូលចូលវិញផងដែរ៕

 

អត្ថបទ៖ វ៉ាន្នី

មតិយោបល់